اسلام آباد۔5اگست(اے پی پی) صدر مملکت آصف علی زرداری آکھیے پاکستان سلامتی کونسل دی متعلقہ قرارداداں موجب بھارت دے غیر قانونی زیر تسلط مقبوضہ جموں وکشمیر دے عوام دے ناقابل تنسیخ حق ِخودارادیت گھنݨ سانڳے انہاں دی منصفانہ جدوجہد دی مکمل اخلاقی، سفارتی تے سیاسی حمایت جاری رکھیسی ، بھارت مقبوضہ جموں و کشمیر دے آبادیاتی ڈھانچے اتے سیاسی منظر نامے کوں بدلݨ سانڳے 5 اگست 2019 توں ھک مسلسل مہم دا آغاز کرچکے، جموں و کشمیر اچ ٻاہر دے لوکاں کوں ڈومیسائل سرٹیفکیٹ جاری کرݨ ، ووٹر لسٹاں اچ عارضی رہائشیاں دا اندراج، اسمبلی حلقیں اچ تبدیلیاں اتے زمین تے جائیداد دی ملکیت دے قوانین اچ ترمیم ایں مہم دا حصہ ہن اے سارے اقدامات اقوام متحدہ دی سلامتی کونسل دی قراردادوں اتے چوتھے جنیوا کنونشن سودھے بین الاقوامی قوانین دی صریح خلاف ورزی ہن۔ ایوان صدر دے پریس ونگ توں جاری بیان موجب صدر مملکت اے ڳالھ یوم ِاستحصال 5 اگست 2024 دے موقع تے آپݨے سنھیے اچ آکھی اے ۔ انہاں آکھیے اڄ مقبوضہ جموں و کشمیر تے بھارتی غیر قانونی قبضہ مستحکم کرݨ دی مہم کوں پنج سال تھیندے پئن ، غیر قانونی طور تے بھارتی زیرِ تسلط جموں و کشمیر دی بین الاقوامی سطح تے منی ڳئی متنازعہ حیثیت کمزور کرݨ سانڳے اڄ توں 5 سال پہلے بھارت ٻہوں سارے یکطرفہ تے غیر قانونی اقدامات چاتن صدر مملکت آکھیے لکھاں بھارتی فوجیاں دی مسلسل موجودگی پاروں مقبوضہ جموں و کشمیر دنیا دے ساریں توں زیادہ عسکریت زدہ علاقیں اچوں ھک اے ، جموں و کشمیر اچ انسانی حقوق دی سنگین خلاف ورزیاں دی وݙے پیمانے تے دستاویز کاری اتے عالمی سطح تے مذمت کیتی ڳئی اے۔ انہاں آکھیے کشمیری صحافیاں تے انسانی حقوق دے محافظاں نال ناروا سلوک اختلافی آوازاں کوں چپ کراوݨ سانڳے بھارت دے کہیں وی حد تئیں ونڄݨ دی آمادگی کوں ظاہر کریندے۔ صدر مملکت آکھیے بھارت5 اگست 2019 توں گھن تے ہݨ تئیں دے اقدامات نال بین الاقوامی قانون، کشمیری عوام دی امنگاں تے اقوام متحدہ دی سلامتی کونسل دی قرارداداں دی مکمل بے توقیری کریندا آندے ، بھارت دی داخلی قانون سازی اتے عدالتی فیصلے کشمیری عوام دی منصفانہ جدوجہد کوں دبا نی سڳدے، گزریل ست ݙھاکیں توں کشمیری عوام اقوام متحدہ دی طرفوں آپݨے وعدے نبھاوݨ دے انتظار وچ ہن،بین الاقوامی برادری بھارت تے زور پاوے او مقبوضہ جموں و کشمیر اچ انسانی حقوق دی خلاف ورزیاں بند کرے اتے سلامتی کونسل دی متعلقہ قرارداداں تے عمل درآمد کرے۔ صدر مملکت آصف علی زرداری پاکستان دے ایں اصولی موقف دا اعادہ کیتے جو پاکستان سلامتی کونسل دی متعلقہ قرارداداں موجب جموں و کشمیر دے عوام دے ناقابل تنسیخ حق ِخودارادیت گھنݨ سانڳے انہاں دی منصفانہ جدوجہد دی مکمل اخلاقی، سفارتی تے سیاسی حمایت جاری رکھیسی۔
