لاہور۔13مئی (اے پی پی):وفاقی وزیر ریلوے خواجہ سعد رفیق ترنول ریلوے اسٹیشن کوں احتجاج ویلھے بھاہ لاوݨ دی شدید مذمت کریندے ہوئیں آکھیے ملوث لوک وٹھیے ڳئن جنہاں کوں قانون دے مطابق کیفر کردار تئیں پڄایا ویسی ۔ انہاں آکھیے ترنول ریلوے اسٹیشن قومی اثاثہ اے اتے قومی اثاثیں کوں تباہ کرݨ دی کہیں کوں اجازت نی ݙتی ونڄ سڳدی ۔ وفاقی وزیر ریلوے کوئٹہ، ٹریک تے دھماکیں دی شدید مذمت کریندے ہوئیں آکھیے مجرماں دا پیچھا کرتے انہاں کوں گرفتار کیتا ویسی ۔ریلوے ہیڈکوارٹرز لاہور اچ تھیوݨ آلے اعلی سطح دے اجلاس اچ وزیر ریلوے کوں سبی ہرنائی سیکشن تے موجودہ صورت حال اتے اتھاں ٹرین آپریشن بحالی اچ آندیاں رکاوٹاں ہٹاوݨ بارے بریفنگ ݙتی ڳئی ی۔کراچی ایکسپریس بھاہ لڳݨ دے واقعہ تے وفاقی وزیر متعلقہ افسران کوں ہدایت کیتی جو واقعہ دی فرانزک رپورٹ وختی منگوائی ونڄے ۔اجلاس اچ ایم ایل ون منصوبے دے تخمینے کوں گھٹ کرݨ دی مختلف تجاویز تے بحث اتے ریلوے زمیناں تے قائم دوکاناں دی نیلامی تے وی تفصیلی ڳالھ مہاڑ تھئی ۔ خواجہ سعد رفیق کوں سکریپ ڈسپوزل دی پراگریس بارے اپ ڈیٹ وی ݙتی ڳئی ۔بکنگ ایپلی کیشن اچ تعطل آوݨ دی شکایات دا نوٹس گھندے ہوئیں وزیر ریلوے آئی ٹی ڈائریکٹوریٹ کوں ایپلی کیشن دی بلا تعطل روانی یقینی بݨاوݨ دی ہدایت کیتی ۔
