اسلام آباد۔2اکتوبر (اے پی پی) ملک دے نامور اداکار ، کامیڈی دے بادشاہ اتے لیجنڈ عمر شریف طویل علالت دے بعد انتقال کر ڳئے۔ میڈیا ہفتے کوں انہاں دے ٹبر دے ذرائے بارے انہاں دی موت دی تصدیق کریندیں ہوئیں آکھیا جو معروف فنکار عمر شریف آپݨی ذال دے رلے علاج کیتے امریکا ویندے پئے ہن۔ عمر شریف کوں جرمنی دے شہر برلن دے ہسپتال اچ داخل کیتا ڳیا ہئی۔ جتھاں انہاں چھیکڑی ساہ ڳھدے۔ عمر شریف 19 اپریل 1955 کوں جمیے۔ او ہک پاکستانی اداکار ، مزاح نگار ، ہدایت کار ، پروڈیوسر اتے ٹیلی ویژن دی اہم شخصیت ہن اتے انہاں دا شمار برصغیر دے وݙے مزاح نگاراں اچ تھیندا ہئی۔
