اسلام آباد۔6جولائی (اے پی پی):وفاقی وزیر داخلہ رانا ثناء اللہ آکھیے جوعمران خان سارا کجھ ݙساوݨ چاہندن تاں ݙساون جو 2014 اچ دھرنا کئیں دے آکھݨ تے ݙتا ،50ارب عوام دا ٻوڑ تے 5ارب دے اثاثے بݨاوݨ تے بشیر میمن دے سوالاں دا کیا جواب اے ،عمران خان کوں اصل مسئلہ اے ہے جو او اقتدار اچ کائنی ، عمران خان دیوار نال لاوݨ دی ڳالھ دی آڑ اچ این آر او منگدا پئے ،انہاں دے حواریاں توں سوال کیتے ونڄن تاں او غداری اے، ماضی اچ عمران خان ایسسٹس ریکوری سیل دی آڑ اچ انتقامی کارروائی کریندے پئے ہن ، ہݨ انہاں کوں حوصلہ کرݨا چاہیدے جیڑھے کوڑے کیس بݨیندے رہیے ہݨ انہاں کوں سچے کیسز دا سامݨا کرݨ دی ہمت کائنی ، توشہ خانہ توں 15فیصد جمع کراتے 15توں 20کروڑ دیاں گھڑیاں چوری کرݨ آلا کیویں صادق و امین تھی سڳدے ، کوئی وی آڈیو یا وڈیو ریکارڈنگ کہیں دا جرم یا مجرمانہ فعل کوں ثابت کرݨ کیتے کیتی ویندی اے، اوجرم کائنی ، جے کہیں کوں بلیک میل کرݨ کیتے کیتی ونڄے تاں غلط اے۔ او ٻدھ کوں پی ٹی وی ہیڈکوارٹر اچ پریس کانفرنس توں خطاب کریندے پئے ہن ۔ وفاقی وزیررانا ثناء اللہ آکھیے جو گزریل ݙینھ عمران خان ھک وڈیو جاری کیتی جو اساکوں ہراساں،تنگ کیتا ویندا پئے تے کندھی نال لاتا ویندا پئے ،جے اے سلسلہ بند نہ تھیوے تاں میں او سارا کجھ ݙسا ݙیساں ، پہلی ڳالھ تاں اے ہے جو ݙساؤ تساکوں کیویں ہراساں کیتا ویندا پئے ، کیا تساݙے خلاف مقدمیں کیتے ویندے پئن یا کوٹ لکھ پت جیل اچ بند، دوائیں بند تے گھر توں کھاݨے دی سہولت نی ݙتی ویندی پئی ۔
.jpg)
