اسلام آباد۔7اگست (اے پی پی) وزیر مملکت خزانہ بلال اظہر کیانی آکھیے جو پاکستان دے زرمبادلہ دے ذخیرے 20 ارب ڈالر توں ودھ ڳئن جیڑھے ملکی معیشت دے استحکام اتے بہتر مالیاتی حکمت عملی دا مظہر اے۔ ڈیجیٹل نیشنل سمٹ توں خطاب کریندیں انہاں آکھیا جو ایں ویلھے سٹیٹ بینک آف پاکستان کنے 15 ارب ڈالر جݙاں جو کمرشل بینکاں کنے 5.5 ارب ڈالر دے ذخیرے موجود ہن۔ بلال اظہر کیانی آکھیا جو موجودہ حکومت دیاں معاشی پالیسیاں پاروں ملک میکرو اکنامک استحکام آلے پاسے ویندا پئے ۔” انہاں ݙسایا جو مہانگ دی شرح اتے پالیسی ریٹ اچ کمی آئی اے جیں نال کاروباری اتے سرمایہ کاری دے ماحول اچ بہتری آئی اے۔ انہاں مزید آکھیا جو حکومت دا اڳلا ہدف پائیدار اتے جامع اقتصادی ترقی اے جیں کیتے برآمدات کوں ودھاوݨ، صنعتی پیداوار اچ ودھارا کرݨ اتے ٹیرف اصلاحات جیھے اقدامات کیتے ویندے پئن۔ وزیرمملکت آکھیا جو حکومت معیشت دی ڈیجیٹلائزیشن تے خصوصی توجہ ݙیندی پئی اے تاں جو ٹیکنالوجی دے ذریعے شفافیت اتے کارکردگی کوں بہتر بݨایا ونڄ سڳے۔ انہاں فیڈرل بورڈ آف ریونیو (ایف بی آر) اچ جاری اصلاحات دا وی ذکر کیتا جنہاں دا مقصد محصولات اچ ودھارا اتے ٹیکس نیٹ کوں ودھاوݨ اے۔ انہاں ایں عزم دا اظہار کیتا جو حکومت مالی نظم و ضبط برقرار رکھیندے ملک کوں ترقی، روزگار اتے خوشحالی دے رستے تے ٹوریسی۔
.jpg)
