اسلام آباد۔25جنوری(اے پی پی) وفاقی وزیر داخلہ محسن نقوی یونائیٹڈ سٹیٹس چیمبر آف کامرس دا دورہ کیتا تے یو ایس پاکستان بزنس کونسل دے اعلیٰ سطحی وفد نال ملاقات کیتی ۔ملاقات اچ کان کنی اتے انفارمیشن ٹیکنالوجی دے شعبیں اچ سرمایہ کاری تے تعاون ودھاوݨ تے تفصیلی ڳالھ مہاڑ کیتی ڳئی ۔ وزیر داخلہ امریکی سرمایہ کاراں کوں پاکستان دے کان کنی اتے آئی ٹی دے شعبیں اچ سرمایہ کاری دی دعوت وی ݙتی۔وزیر داخلہ پاکستان اچ کم کرݨ آلی امریکی کمپنیاں دے مسئلے سݨیے تے انہاں دے تحفظات کوں ترجیحی بنیاداں تے مکاوݨ دا یقین ݙیوائے ۔ انہاں مزید آکھیے امریکہ پاکستان بزنس کونسل پاکستان اچ سرمایہ کاری دے ٻہوں سارے موقع توں فیدہ چاسڳدی اے ۔ محسن نقوی آکھیے پاکستان معاشی استحکام دے پاسے ودھدا پئے ، سارے اقتصادی اشاریے چنڳے تھی ڳئن تے معیشت ٹیک آف کریندی پئی اے۔ انہاں امریکہ پاکستان بزنس کونسل کوں پاکستان اچ سرمایہ کاری دی دعوت وی ݙتی کیوں جو پاکستان سرمایہ کاری دے پرکشش موقع ݙیندے ۔ انہاں آکھیے ضروری این او سی جاری کرݨ کوں ہموار کیتا ڳئے ۔ انہاں کونسل کوں ترجیحی بنیاداں تے خصوصی سہولتاں ݙیوݨ دا یقین وی ݙیوائے ۔وفد اچ یو ایس چیمبر آف کامرس دے سینئر نائب صدر چارلس فری مین، یو ایس پاکستان بزنس کونسل دی ایگزیکٹو ڈائریکٹر تے صدر ایسپرانزا جیلالیان، سینٹر فار گلوبل ریگولیٹری کوآپریشن دے ایگزیکٹو ڈائریکٹر ایبل ٹوور اتے منیشا ویپا یو ایس پاکستان بزنس کونسل شامل ہن۔ ایں موقع تے امریکا اچ پاکستان دے سفیر رضوان سعید شیخ، تجارتی اتاشی اتے ٻئے حکام وی موجود ہن۔
.jpg)
